Kryetari i Kuvendit të Kosovës, Glauk Konjufca, ka uruar Ditën e Evropës, 9 majin, e cila shënohet në Kosovë si festë zyrtare, raporton teve1.info
Përmes një statusi në Facebook, Konjufca ka thënë se rruga e Kosovës është vetëm një dhe sipas tij, ajo është drejt Bashkimit Evropian.
“Rruga e Kosovës është vetëm një, është ajo e Evropës, e frymës dhe parimeve të saj dhe çdo propozim tjetër është cenim i saj dhe i këtyre parimeve.
Rruga e vendeve joanëtare për në BE është njëkohësisht edhe rruga e BE-së drejt idesë së lartë të Evropës së Bashkuar, rruga ku ajo duhet të përmbush vetveten duke takuar vlerat e saj.
Sot festojmë Ditën e Evropës, për një Bashkim Evropian sa më të thellë, që nuk reduktohet në peshë teksa vijon procesin e zgjerimin.
Gëzuar 9 majin, Ditën e Evropës, ditën e aspiratës së lartë të paqes së drejtë, demokracisë dhe vlerave universale!”, ka shkruar Konjufca.
Kryeparlamentari Konjufca ka thënë se Kosova është shembull i shkëlqyer i demokracisë dhe vlerave universale të BE-së.
“Dita e Evropës, sidomos në kohën kur po ndodh lufta në Ukrainë, thërret një Evropë që në bazë ka ekonominë, por të asaj natyre që i rri përshtat thellësisë politike dhe linjave të qarta gjeopolitike, pa flirtime me elemente autoritare, që do të rrezonte parimin e demokracisë.
Kosova është sot një shembull i shkëlqyer i demokracisë dhe vlerave universale të Bashkimit Evropian, me të cilat shteti ynë synon të jetë sa më i akorduar, përtej të cilave nuk mund të bëhet lëshim, sepse ekzistenca e tij është e lidhur thelbësisht me të qenit e tij demokraci dhe vend i këtyre vlerave universale’, ka shkruar ndër të tjera Konjufca në Faceook.