Ministri i Bujqësisë, Faton Peci i ka vizituar hapësirat afër Tregut të Automjeteve në Prishtinë, të cilat po shfrytëzohen për tregtim dhe therje ilegale të bagëtive.
Peci ka shkruar se ekziston një numër i madh i faktorëve mikrobiologjik që e kontaminon mishin qe nxirret nga shpezët të cilat therren në kushte jo-higjienike, duke iu ekspozuar pluhurit, tymit të automjeteve dhe shumë papastërtive të tjera.
“Si nga ata që tregtojnë e deri tek blerësit duhet ta kuptojnë se: Ky lloj i të bërit pazar është i rrezikshëm për shëndetin veterinarë (fondin e shpezëve) por edhe për shëndetin njerëzor”, ka shkruar Peci.
Tutje ka potencuar se do të kërkojë nga kryetarët e komunave të bëhen veprimet për caktim lokacionesh, regjistrim nga komuna, pastaj titullari të regjistrohet si subjekt në ARBK- MINT dhe pas këtyre hapave ta finalizojë edhe regjistrimin apo licencimin në AUV.
“Pas kësaj këto lokacione do të hynin në planet nacionale për kontrolla zyrtare të AUV-së ku brenda tyre do të lejohej edhe tregtimi i produkteve ushqimore në hapësira të veçanta duke respektuar kushtet qe duhet ti plotësojnë. Therjet lejohen vetëm ne thertore të licencuara në asnjë vend tjetër”, ka shkruar ministri.
“Shëndeti dhe mirëqënia e qytetarëve është gjëja me e çmueshme që ka një vend andaj nuk do lejojmë askënd që ta rrezikojë”, vijon tutje postimi.