Kryetari i KF Lirisë, Qemal Krasniqi, ka reaguar pas postimit që u bë më herët nga llogaria e tij në “Facebook”, ku u ofenduan rahovecianët, pak pas ndeshjes që Liria e fitoi ndaj Rahovecit në Ligën e Parë. Krasniqi, përmes atij postimi, bëri një ofendim ndaj rahovecianëve, të cilët i quajti “bugar”.
Pastaj, Krasniqi, duke shfrytëzuar faqen zyrtare të klubit prizrenas, kërkoi falje ndaj Rahovecit, duke u arsyetuar se llogaria e tij në “Facebook” është hakuar. Tani, ai përmes llogarisë së tij, ka kërkuar falje publike.
Postimi i plotë nga Krasniqi (pa ndërhyrje):
“Të nderuar Rahovecjan , ju qe keni dhën shumë per këtë vend , ju kerkoj falje publike ,sepse dikush per disa orë ka manipulue ne FB tim .
Ato që janë shkruar janë bërë per qellime te ulëta duke u munduar të më prishin imazhin tim.
Respekt per gjithë juve !”
Edhe te KF Rahoveci kanë reaguar për këtë gjuhë nga Krasniqi, teksa ata i bënë thirrje organeve të Federatës së Futbollit të Kosovës (FFK) që të marrin masat e duhura.
Reagimi i plotë nga klubi i Rahovecit:
“Nga mediat u njoftuam për një huqje totale të kreut të klubit prizrenas, Qemal Krasniqi. Si klub dënojmë ashpër këtë gjuhë fyese e aspak njerëzore, duke u bërë thirrje organeve relevante brenda FFK-së që të marrin masa konform dispozitave ligjore në fuqi”.