Kryeministri i Shqipërisë, Edi Rama deklaroi sot se në zgjedhjet e 14 majit do të ketë një rezultat shumë kuptimplotë për të gjithë.
Në një prononcim për mediet, pas mbledhjes së kryesisë së Partisë Socialiste, Rama tha se “mbi të gjitha do të kemi një rezultat që aq sa do të na shpërblejë për punën që kemi bërë, aq do të na motivojë për punën që do të bëjmë”.
“Kundërshtarët tanë të vërtetë janë problemet që ka çdo bashki dhe janë problemet që kemi për të adresuar dhe zgjidhur si vend. Jemi në një moment të jashtëzakonshëm për nga shumë elementë sepse po dalim nga një kthesë e madhe e fortë në planin ekonomik”, tha ai, raporton abcnews.al.
Rama sqaroi po ashtu deklaratën e tij bërë në fushatë elektorale, për të mos votuar kandidatët e koalicionit ‘Bashkë Fitojmë’.
“E para nuk kam folur për kandidatë, po për kukulla të një çifti ku kemi një non grata, kemi thirrje të SHBA për të bërë kujdes në këtë pikë. Zgjedhja është e shqiptarëve, por edhe cilësia e marrëdhënieve dhe natyra e raporteve është e aleatëve tanë. Ata vendosin në momentin kur një individ non grata, mban damkën e personit që është i padëshirueshëm. Kjo e bën të vështirë, kjo është është një mënyrë për t’ia thënë drejtpërdrejtë njerëzve se këta kandidatë nuk janë vënë aty për hallet e komunitetit, por janë vënë aty për të krijuar oaze të luftës politike, për të ngritur barrikada me qeverinë qendrore e për të trajtuar bashkitë si pengje lufte”, ka thënë ai.
