Drejtori ekzekutiv i Institutit të Kosovës për Drejtësi, Ehat Miftaraj, ka thënë se kryetarët e zgjedhur fitues në katër komunat veriore në zgjedhjet e mbajtura të dielën e kanë të vështirë ta çojnë mandatin deri në fund.
Miftaraj thotë që nëse në veri të vendit nuk funksionon lidhja qytetarë-kryetar, atëherë vështirohet ushtrimi i detyrave dhe përgjegjësive të kryetarëve.
“Do të jetë e vështirë për të katër kryetarët e komunave në veri ta përfundojnë mandatin deri në fund nëse qytetarët serb nuk i pranojnë vendimet e tyre, nuk e pranojnë përfaqësimin e tyre. Nëse lidhja qytetarë-kryetar nuk funksion, në një mënyrë e vështirëson ushtrimin e detyrave dhe përgjegjësive të tyre”, tha ai në emisionin “ResPublika” në Tëvë1.
Sipas Miftarajt, zgjedhjet kanë kaluar në nivel politik dhe kjo në të ardhmen jo detyrimisht, por mundet që kryetarët t’i vendos para një situate që vetë do të japin dorëheqje, në mënyrë që të mbahen zgjedhje të reja.
“Zgjedhjet nga një proces, i cili do të duhej të ishte i bazuar në ligj e në procedurë, fatkeqësisht kanë kaluar në nivel politik dhe diplomatik, ku varësisht se çfarë do të ndodhë në të ardhmen ndoshta mund të kemi një marrëveshje, e cila në një mënyrë jo që mundet me i detyrua kryetarët e komunave, por i qet para një akti ku të njëjtit mund të ofrojnë dorëheqjet e tyre për të mbajtur zgjedhje të reja, ku mund të marrin pjesë në zgjedhje një pjesë më e madhe e qytetarëve në veri”, tha ai.
Zgjedhjet e mbajtura të dielën kanë nxjerrë fitues në Leposaviq partinë Vetëvendosje me 73.5%, si dhe në Mitrovicë të Veriut me 66.5%. Ndërsa, në dy komunat tjera në atë të Zubin Potokut ka fituar Partia Demokratike e Kosovës me 52.1%, në Zveçan me 60%. /teve1.info/
