Deputeti i PDK-së, Rashit Qalaj e ka cilësuar brengosëse deklaratën e kryeministrit Albin Kurti sa i përket arrestimit të kryeshefit të KEK-ut, Nagip Krasniqi.
Qalaj në emisionin “Këndi i Debatit”, madje tha se me këto deklarata të Kurtit nuk është sulmuar vetëm personaliteti i prokurorit në fjalë, por është sulmuar gjithë sistemi i Drejtësisë në vend.
“Është brengosëse kur kryeministri i vendit jep një deklaratë të tillë. Ne si opozitë nuk jemi gëzuar, por është një veprim që na ka brengosë, por që e kemi pritur sepse që nga Janari i vitit të kaluar ne jemi duke folur për keqpërdorime në sektorin e energjisë. Është shumë brengosëse kur i pari i Qeverisë jep një deklaratë të ashpër ndaj prokurorisë së shtetit. Unë konsideroj se nuk është sulmuar vetëm personaliteti i prokurorit së specialës por i tërë sistemi prokurorial i vendit dhe sistemi i Drejtësisë”, tha ai.
Madje Qalaj tha se ndoshta mund të fshihet diçka pas këtij rasti me vet faktin që siç tha ai kryeministri “po i jep zor”.
“Ndoshta ka diqka kryeministri që realisht i jep zor kështu, ndoshta ka diqka që fshihet pas këtij arrestimi dhe do të dalin të gjitha ato. Po shpresoj unë i besoj sistemit të Drejtësisë së Kosovës, unë i besoj ashtu si është mirëpo ky reagim i deputetëve bile ke shumë shqetësuese unë nuk e di pse sot kryeprokurori i shtetit nuk e ka ftuar njërin prej deputetëve i cili ka shkruar mundësinë e atentatit ndaj zotit Krasniqi, që është arrestuar pra është e tmerrshme kur një deputet shkruan ashtu”, tha tutje ai.
Ndryshe sot Gjykata Themelore në Prishtinë ia ka caktuar masën e paraburgimit prej 1 muaji kryeshefit të KEK-ut, Nagip Krasniqi./teve1.info./
