Juristët thonë se në Kuvendin e Kosovës është e drejtë të iniciohet ndryshimi i Ligjit për Dhomat e Specializuara, por kanë një paralajmërim rreth zbatimit të tij.
Ata kanë edhe një kërkesë sa i përket nismës së PDK-së për ndryshimin e Ligjit për Dhomat e Specializuara.
“Është e drejtë, është kompetencë e Kuvendit që të iniciojë iniciativa ligjore, përfshirë edhe plotësim-ndryshimin e ligjit mbi Dhomat e Specializuara. Sidoqoftë, është me rëndësi të ceket që PDK-ja, po edhe Qeveria e Kosovës, krahas plotësim-ndryshimit, do të duhej të kishte edhe takime me shtetet e Këshillit të Bashkimit Evropian”, ka thënë Miftaraj.
Por çfarë mund të ndodhë nëse ndryshimet miratohen nga Kuvendi.
“Edhe nëse Kuvendi i Kosovës e ndryshon dhe e plotëson ligjin, së paku në bazë të amendamentit kushtetues, ligji mbi Dhomat e Specializuara, çdo ndryshim-plotësim do të shkonte në vlerësim të Dhomave të Specializuara, respektivisht të panelit të gjykatësve ndërkombëtarë”, u shpreh tutje Miftaraj.
Megjithatë, për dike ndryshimet mund të bëhen teorikisht por praktikisht mund të kenë probleme.
“Mendoj se këto kërkesa janë të drejta, por sa do të jenë të ligjshme dhe kushtetuese pak më problem është kjo punë. Unë kam thënë se teorikisht kjo mund të ndryshohet, mirëpo praktikisht është shumë problem, për shkak se menjëherë preket Kushtetuta me ndryshimin e ligjit”, tha Shala.
Përndryshe, Kuvendi i Kosovës të hënën ka miratuar deklaratën lidhur me aktgjykimin e Dhomave të Specializuara të Kosovës.
