Të dielën e 23 prillit pritet që ato të mbahen zgjedhjet në veri të vendit. 11 kandidatë garojnë për kryetarë në katër komunat veriore.
Mirëpo, sipas analistit Tomor Avdija, zgjedhjet po përpiqen të pengohen nga Serbia.
“Ka një frymë destruktive që vazhdon dhe e mbështetë dhe e luan Beogradi për mosmbajtjen e tyre, për arsye se partia e cila dirigjohet direkt nga presidenti Vuçiq ka hezituar të merr pjesë në zgjedhje, jo për mos pasje të kushteve për mbajtjen e tyre por për urdhra politik dhe për interesa të Beogradit”, thotë ai.
Por për mbajtjen e zgjedhjeve në veri kanë reaguar edhe vendet e Quint-it.
Na vjen keq që Lista Srpska nuk e shfrytëzoi të drejtën demokratike për të marrë pjesë në këto zgjedhje. Zgjedhjet janë themeli i demokracisë. Të sigurohet që ato të mbahen në një mënyrë paqësore dhe e rregullt është thelbësore.
Presim që autoritetet përkatëse të veprojnë me profesionalizëm. Ne u bëjmë thirrje të gjitha palëve të ushtrojnë përmbajtje dhe të shmangin dhunën, e cila prishë zgjedhjet.
E situatën në veri e konsideron delikate – njohësi i çështjeve të sigurisë, Bedri Elezi.
“Në veriun e vendit konsiderohet si një situatë mjaft delikate sepse mund të kemi aktivitete të dhunshme të organizuara nga struktura në veri të Mitrovicës e të mbështetura nga Beogradi Zyrtar”, thotë Elezi.
Megjithatë para zgjedhjeve, Elezi pret që presidentja e Kosovës, Vjosa Osmani të ftojë në takim institucionet e sigurisë.
“Unë pres që do të kemi një takim dhe gjithashtu pres që presidentja më në fund do të kërkojë një vlerësim nga institucionet e sigurisë për kushtet eventuale dhe për mbajtjen e këtyre zgjedhjeve dhe për sa e shoh situatën unë mendoj se mund të kemi edhe shtyrje të zgjedhjeve”.
Tëvë1 ka provuar gjatë ditës që të marr përgjigje nga Presidenca e Kosovës lidhur me atë se a do të zhvillohet një takim mes presidentes Osmani dhe institucioneve relevante për zgjedhjet në veri, mirëpo nga ky institucion nuk i janë përgjigjur interesimit të televizionit.
Kronika e realizuar nga gazetarja Albiona Hajdari
