Deputetja e LDK-së, Hykmete Bajrami, ka reaguar pas deklarimit të ministrit të Financave se çmimet u rritën pasi u kundërshtuan çmimet tavan nga LDK, raporton teve1.info
Bajrami këtë reagim të ministrit Murati e ka quajtur ankesë e cila sipas saj po vazhdon tash e dy vite.
Përmes një statusi në Facebook, deputetja Hykmete Bajrami, ka shkruar se shteti posedon mjaftueshëm ligje të cilat e mbrojnë konsumatorin, derisa ligjin për caktimin e çmimeve tavan e ka quajtur antikushtetues.
“Dy vite qeverisje me ankesa
Sot, Murati qenka anku se si LDK s’po e lejon me e shkelë Kushtetutën!
Ligji për çmimet tavan nuk e adreson çështjen e inflacionit as atë të spekulimit me çmime. Ligjin të cilin LDK e ka ataku në Gjykatë Kushtetuese është në kundërshtim me Kushtetutën, respektivisht nenin 10 të saj. Ligji si i tillë do të mbyllte me mijëra biznese familjare në fshatra dhe lagje periferike duke krijuar situatë edhe më të favorshme për tregtarët e mëdhenj.
Ky vend e ka Ligjin për Mbrojtjen e Konkurrencës, ka Inspektorat të Tregut dhe i ka krejt mekanizmat e nevojshëm për të marrë masa sa herë që dëshmohet se dikush po spekulon me pozitën dominuese në treg, apo po spekulon me çmime. Krejt çka i duhet kësaj Qeverie është që pas dy viteve pushim me fillu me punu, që këto mekanizma me i shti në funksion dhe me i implementu ligjet që janë në fuqi.
Qeveria, gjithashtu duhet me dalë në teren, me bisedu me biznese përtej oborrit të tyre, me pa si ju ka ndiku ngritja e çmimit të rrymës, me i pyet për politika të nevojshme fiskale, me i pyet për kostot e operimit të tyre dhe me pa se si mund të ju ndihmohet atyre për ta përballuar këtë situatë, për të ulë kostot dhe çmimet, shkurt Qeveria duhet me e kry punën sipas mandatit të dhënë.
Mjaftë me ankesa!”, ka shkruar Bajrami.
