Ministrja e Jashtme gjermane, Annalena Baerbock, theksoi të premten “shqetësimin e madh” të Berlinit për rritjen e tensioneve në ngushticën e Tajvanit dhe bëri thirrje që çdo çështje në zonë “të zgjidhet në mënyrë paqësore”.
Komentet e saj erdhën gjatë një vizite në Kinë ku ajo u takua me homologun e saj kinez Qin Gang për bisedime.
Baerbock iu referua tensioneve në ngushticën e Tajvanit, përmes së cilës kalon pjesa më e madhe e tregtisë ndërkombëtare të botës, dhe tha se një konflikt në zonë do të ishte një fatkeqësi globale.
“Ne i shohim me shqetësim të madh tensionet në rritje në ngushticën e Tajvanit. E kuptojmë ndjeshmërinë e çështjes së Tajvanit por konfliktet duhet të zgjidhen në mënyrë paqësore. Mua më duhet të pyes pse Kina deri më tani nuk është përfshirë në ndonjë thirrje për agresorin, Rusinë, që të ndalë luftën në Ukrainë”, tha diplomatja gjermane.
E ministri i Jashtëm i Kinës, Qin Gang, fajësoi qeverinë e Tajvanit për tensionet e rritura rajonale.
“Nëse të gjithë shpresojnë për stabilitet në ngushticën e Tajvanit dhe paqe e qetësi në rajon, ata duhet të mbajnë një qëndrim të qartë kundër pavarësisë së Tajvanit dhe ndërhyrjeve të huaja. Ky është shkaku kryesor i situatës së tensionuar në ngushticën e Tajvanit sot”, deklaroi ministri kinez.
Partia Komuniste në pushtet e Kinës dërgoi anije luftarake dhe aeroplanë luftarakë afër Tajvanit fundjavën e kaluar në shenjë hakmarrjeje për një takim midis kryetarit të Dhomës së
Përfaqësuesve të SHBA-së Kevin McCarthy dhe presidentes tajvaneze Tsai Ing-Ven.
Qeveritë evropiane janë gjithnjë e më të shqetësuara për presionin kinez ndaj Tajvanit, një qendër globale e teknologjisë së lartë dhe një nga ekonomitë më të mëdha tregtare./Tëvë1/
