Presidenti i Serbisë, Aleksandar Vuçiq është duke zhvilluar në Rashkë takim me përfaqësuesit politikë të serbëve nga Kosova.
Siç raporton media serbe “Tanjug” në takim po marrin pjesë kryeministrja, Ana Bërnabiq, ministri i Mbrojtjes Millosh Vuçeviq, ajo e Bujqësisë Jelena Tanaskoviq dhe ministra të shumtë në Qeverinë e Serbisë, transmeton teve1.info
Të pranishëm janë edhe drejtori i Zyrës Serbe për Kosovën, Petar Petkoviq, si dhe përfaqësues të serbëve nga Kosova, kryetari i komunës së Shtërpcës Dalibor Jevtiq, kryetari i Listës Serbe Goran Rakiq, nënkryetarët Igor Simiq dhe Milan Radoiçiq, kryetarët e komunave Leposaviq dhe Graçanicë, Zoran Todiq dhe Ljiljana Shubariq dhe përfaqësues të tjerë.
Vuçiq në fillim të takimit ai se pas diskutimit për masat socio-ekonomike do të diskutohet edhe për situatën politike dhe të sigurisë në tërë Kosovën dhe në përputhje me atë që do të thonë serbët në takim do të nxjerr përfundime.
Siç tha ai, janë planifikuar gjithsej 28 milionë euro dhe këto mjete do të jenë në dispozicion menjëherë.
Ai po ashtu tha se politika e Serbisë është politikë paqeje dhe tentative për normalizimin e marrëdhënieve me shqiptarët edhe pse ata nuk e duan.
Këtë ai e ka thënë duke iu përgjigjur kryetarit të Listës Serbe, Goran Rakiq, i cili ka kërkuar nga Vuçiq që të dëgjojë serbët nga Kosova dhe vetëm më pas të marrë vendime.
“Politika jonë duhet të jetë një politikë paqeruajtëse. Unë e di që kjo nuk është e pëlqyer nga ju, por politika jonë duhet të jetë edhe një përpjekje për të normalizuar marrëdhëniet me shqiptarët. Unë e di që ata nuk e duan këtë dhe se qëllimi i tyre i vetëm është të t’i njohin dhe pastaj të na përzënë. Kjo është politika e tyre”, tha Vuçiq.
