Skuadra rumune Cluj ka kritikuar FC Ballkani pasi sipas tyre në faturën e dërguar nga skuadra kosovare është futur taksa e solidaritetit, prandaj nuk e kanë paguar kartonin e Ermal Krasniqit.
“Xhebrailat” e shiten Krasniqin në afatin e janarit për 200 mijë euro plus bonsuet, mirëpo ende nuk e kanë marrë asnjë cent nga Cluji.
Presidenti i Clujit, Cristian Balaj ka kritikuar Ballkanin për faturën e dërguar, duke deklaruar se taksa e solidaritetit nuk duhej të futej aty.
“Jo. Afati i fundit ishte në pjesën e dytë të marsit. Ne jemi në fillim të prillit dhe iu kërkuam atyre ta ribëjnë faturën sepse taksa e solidaritetit nuk duhej të ishte futur në të”.
“Ata mbase nuk kanë përvojë në shitjet ndërkombëtare dhe në çastin që vjen fatura, ky telash do të zgjidhet. Bëhet fjalë për 200 mijë euro nga të cilat shuma e solidaritetit duhet të zbritet”, deklaroi ai për “Fanatic”.
Përndryshe, drejtori sportiv i Ballkanit Nderim Nexhipi për Nacionalen ditë më parë kishte konfirmuar që janë duke pritje të parave.
“Po është e vërtetë që nuk i kemi marrë ende paratë. Afati i fundit ka qenë në mars kur munden ta bëjnë pagesën”, kishte thënë ai.
Sa i përket Krasniqit, ai po kalon formën më të mirë karrierës dhe po kërkohet nga disa top klube si Lazio, Torino, Sassuolo dhe Mallorca.