Kryeministri Albin Kurti ka pritur sot në takim ministrin e Punëve të Jashtme dhe Bashkëpunimit Ndërkombëtar të Emirateve të Bashkuara Arabe, Sheikh Abdullah bin Zayed Al Nahyan.
Kurti e ka falënderuar ministrin për ndihmën që ky vend i ka dhënë Kosovës në kohën e luftës, mbështetjes për shpalljen e pavarësisë e posaçërisht për Spitalin e Fëmijëve “Sheikha Fatima” në Prishtinë, që u ndërtua me mbështetjen financiare të Emirateve të Bashkuara Arabe.
Lideri i ekzekutivit ftoi vendin arab që t’i hulumtojë mundësitë për investime që Kosova i ofron.
“Ai e njoftoi për zhvillimet në vend, rezultatet e qeverisjes përgjatë dy viteve të saj, dhe për karakteristika që e bëjnë Kosovën vend të përshtatshëm dhe tërheqës për investitorë. Duke i ftuar që të hulumtojnë mundësitë për investime që Kosova ofron, ai gjithashtu i njoftoi me projektet infrastrukturore në fushën e transportit, dhe për planet dhe mundësitë në fushën e energjisë së ripërtëritshme, në të cilën fushë Emiratet e Bashkuara Arabe kanë përvojë të shquar”, ka njoftuar Zyra e Kryeministrit.
Ndërsa ministri arab u shpreh i lumtur që po viziton prapë Prishtinën teksa falënderoi kryeministrin Kurti për mikpritjen, bashkëpunimin dhe për raportet e shkëlqyeshme bilaterale, ka njoftuar Zyra e Kryeministrit