Real Madridi ka triumfuar 6-0 ndaj Real Valladolidit në kuadër të javës së 27-të në La Liga. Fillimisht, Rodrygo shënoi për 1-0 në minutën e 23-të, me një asistim të Marco Asensisos.
Më pas ishte i gjithë spektakli i Karim Benzemas që realizoi het-trik për shtatë minuta. Goli i tij i parë erdhi në minutën e 29-të, kur Vinicius Junior asistoi te francezi që realizoi për 2-0.
Të dytin, fituesi i Topit të Artë e shënoi në minutën e 32-të, kur u asistua nga Rodrygo.
Braziliani e asistoi edhe një herë Benzeman (36’), që kompletoi het-trikun e tij dhe për rezultatin 4-0.
Me kaq përfundoi edhe pjesa e parë, derisa në të dytën u shënuan edhe dy gola të tjera.
Rodrygo kishte menduar në minutën e 66-të se kishte shënuar golin e tij të dytë në këtë takim, por VAR-i e anuloi për lojë me dorë.
Mirëpo, për 5-0 u përkujdes Asensio në minutën e 73-të, që u asistua pikërisht nga braziliani.
Los Blancos nuk u ndalën me kaq dhe shënuan ehde të gjashtin, tani përmes Lucas Vazquez në minutën e 90+2-të, me një asistim të Eden Hazard.
Pas javës së 27-të, Real Madridi gjendet në vendin e dytë me 59 pikë, ndërsa në xhiron e 28-të do të ketë punë me Villarealin.
