Imami, Ali Ismaili, ka bërë të ditur se mbrëmë pas përfundimit të Namazit të Teravive në Miradi të Eperme, është sulmuar fizikisht nga disa persona të panjohur, raporton teve1.info.
Ismaili, i cili është edhe kryesues i Kuvendit Komunal të Fushë-Kosovës, ka thënë se nuk i ka borxh askujt, si dhe sulmet e tilla nuk e frikësojnë dhe nuk e dalin në kryerjen e obligimeve fetare të tij.
“Unë nga pozita e Kryesuesit të Kuvendit të Komunës dhe nga pozita e Imamit të Xhamisë në Miradi të Epërme, nuk i kam borgj askujt dhe gjithmonë punën time e kam kryer dhe do t’a kryej me ndershmëri dhe përgjegjësi të plotë. Sulmet dhe kërcënimet e tilla nuk më frikësojnë dhe nuk më ndalin në kryerjen e obligimeve të mia karshi qytetarëve”, ka shkruar Imami në Facebook.
Ai ka thënë se kërcënimet që i kanë ndodhë edhe më herët nuk paskan marrë fund, por tani sipas tij, dikush paska vendosur që t’i konkretizojë me sulme fizike.
“Siç duket kërcënimet e mëhershme nuk paskan marrë fund dhe përveç kërcënimeve, tani dikush ka vendosur që t’a konkretizojnë edhe me sulme fizike. I bëj thirrje organeve të rendit që këtë problem t’a hetojnë dhe t’a parandalojnë institucionalisht, sepse sot nuk u realizua, por nesër mund të ndodhë diçka edhe më e keqe!”, ka shkruar tutje Ismaili.
Sulmin ndaj Imamit e ka dënuar Këshilli i Bashkësisë Islame në Fushë-Kosovë, ku kanë thënë se ky rast nuk duhet të ndodhte dhe si i tillë duhet të zbardhet sa më parë.
“Në këtë muaj të shenjtë të Ramazanit, ku do të duhej që solidaritetit, humanizmi dhe paqja të mbretërojë në mesin e shoqërisë tonë, ky rast nuk do të duhej të ndodhte dhe si i tillë duhet të zbardhet sa më parë. Ne jemi në mbështetje të plotë ndaj Imamit tonë dhe e dënojmë cilin do akt të tillë, njëherit kërkojmë që urgjentisht organet e rendit të reagojnë për parandalimin e akteve të tilla, dhe autorët të dalin para drejtësisë!”, thuhet në njoftim e tyre. /teve1.info/