Një ditë para përfundimit të mandatit të Guvernatorit të BQK-së, ende nuk është zgjedhur pasuesi apo pasuesja e Fehmi Mehmetit.
Ekonomisti, Erton Bega thotë se në këso raste të vonesës së përzgjedhjes së guvernatorit të ri, cenohet vendimmarrja dhe krijohet pasiguri te stafi.
“Sigurisht që vendimmarrja cenohet kur nuk kemi emërim në kohë të duhur. Sepse kushdo që ushtron detyrën, me ligj vendimmarrja nuk mund të jetë e plotë. Sepse së pari kur kemi ndryshime në krerët e institucioneve të rëndësishme siç është BQK-ja, së pari krijohet një pasiguri tek individët të cilët janë pjesë e BQK-së. Sepse kanë paqartësi për politikat të cilat duhet t’i ndjekin, nuk mund të gjeneralizohet përgjegjësia në disa anëtarë. Kjo është përgjegjësi që i takon një individi i cili duhet t’i ketë kualifikimet e kërkuara ligjore për t’i ushtruar detyrat të cilat ia jep ligji”, ka thënë Bega.
Në këtë rast sipas Begës vendimmarrja është e personalizuar dhe kur s’ka guvernator krijohet burokraci.
“Dhe në momentin kur kalojmë nga një vendimmarrje individuale, sepse guvernatori e ka ekzekutivin e tij si ekip por vendimmarrjen e ka të personalizuar, prandaj në momentin kur një vendimmarje e personalizuar gjeneralizohet në Bord, atëherë automatikisht ka procedura të tjera që krijojnë vonesa dhe burokraci të panevojshme”, ka thënë Bega në Ditari në Tëvë 1.
Dilema dhe pasiguri sipas Begës, do të ketë edhe te ndërkombëtarët që e monitorojnë procesin.
“Prandaj institucione të tilla si BQK-ja, Trusti dhe institucione të tjera me rëndësi vitale për ekonominë nuk duhet të lihen në mëshirë të fatit sepse të gjitha afatet ligjore janë të parashikueshme dhe të gjitha veprimet ka pasur mundësi të ndërmirren. Kjo shumicë parlamentare i ka numrat fatmirësisht për të mos shkaktuar vonesa të tilla, sepse përveçse krijojnë pasiguri te stafi se çfarë veprime duhet të ndërmarrin, krijojnë pasiguri edhe në partneritetet me organizatat ndërkombëtare sepse ato e monitorojnë nga afër këtë proces të emërimit dhe sigurisht që do të ngrehin dilema sepse saherë të kemi vonesë shihet si mospërgjegjësi”.
