Kryeministri i Kosovës, Albin Kurti, gjatë ditë së sotme është duke qëndruar për vizitë në Tiranë, ku atje është pritur nga presidenti i Shqipërisë, Bajram Begaj, me të cilin ka biseduar mbi zhvillimet më të fundit të negociatave mes Kosovës dhe Serbisë.
Begaj ka shkruar se ka vlerësuar maturinë dhe kurajon e treguar nga Kurti dhe ekipi negociator i Kosovës, për ta pranuar planin evropian, si dhe për ta nënshkruar e zbatuar atë.
“Theksova se dakordësimi publik dhe angazhimi i palëve për të zbatuar planin evropian të normalizimit të marrëdhënieve midis Kosovës dhe Serbisë dhe aneksin përkatës, si një pjesë integrale të tij është një garanci më shumë për paqen, stabilitetin dhe të ardhmen e vendeve të rajonit në Bashkimin Evropian”, ka shkruar Begaj.
Presidenti i Shqipërisë, shprehu besimin se zotimi i marrë nga palët në Ohër do të respektohet plotësisht, ndërkohë do të gjenden mekanizmat e duhur për ta kthyer këtë dakordësim publik në një marrëveshje të detyrueshme e të zbatueshme për palët ndërkombëtarisht.
