Presidentja e Kosovës, Vjosa Osmani, ka përkujtuar 24-vjetorin e masakrës në Krushë të Madhe ku u vranë 243 persona.
Osmani ka thënë se krimet e luftës asnjëherë nuk vjetërsohen teksa ka shtuar se shteti asnjëherë nuk do të dorëzohet që të vihet drejtësia.
“Sikurse çdo vit ne i përkujtojmë 241 burra e djem, 7 fëmijë e 5 gra, në mesin e të cilave njëra shtatzënë, të vrarë mizorisht, në mënyrën më macabre nga regjimi gjenocidal i Serbisë. Teksa kujtojmë këtë ditë tmerri, plagët e Krushës së Madhe janë ende të hapura. Prej më tepër se 20 vjetësh, fati i intelektualit Ukshin Hoti ende mbetet i pazbardhur. I tillë mbetet edhe fati i 64 banorëve të Krushës së Madhe të cilët figurojnë të zhdukur. Zemrat e copëtuara të nënave, grave, motrave e të fëmijëve të krushianëve ende kërkojnë drejtësinë e munguar. Krimet e luftës asnjëherë nuk vjetërsohen, njësoj sikurse gjenocidi që kishte qëllim shfarosjen e popullit shqiptar”.
“Ndaj sot dhe gjithnjë nuk do të ndalemi së kërkuar që autorët të vihen para drejtësisë dhe që fati i patriotit të madh, Ukshin Hoti, të zbardhet. Asnjëherë nuk duhet të heshtim as të dorëzohemi. Ne duhet të besojmë dhe angazhohemi të gjithë së bashku për ta mbrojtur të vërtetën e cila po tentohet të vjetërsohet dhe për ta vendosur drejtësinë”, ka deklaruar Osmani, shkruan teve1.info.
E para e shtetit ka shtuar se nuk mund të ketë paqe në rajon pa zbardhjen e fatit të të zhdukurve me dhunë.
“Krusha e Madhe është ndër rrëfimet më të tmerrshme të luftës sonë. Dhe fatkeqësisht rrëfimi për Krushën e Madhe ende nuk ka mbaruar. Na duhen ende punë që krushjanët ta gjejnë paqen. Ideja e intelektualit Ukshin Hoti për republikë, liri dhe demokraci ende nuk është përmbushur sepse ende nuk kemi drejtësi për viktimat. Nuk mund të ketë paqe e stabilitet në rajon pa zbardhjen e fatit të të zhdukurve me dhunë si dhe pa vënien e autorëve para drejtësisë. Të vërtetën për Krushën do ta themi kudo e kurdo”, ka thënë ajo.
