Kryetari i Aleancës për Ardhmërinë e Kosovës, Ramush Haradinaj ka thënë se kryeministri Kurti në dy vitet e qeverisjes i ka shpallur luftë të gjitha kategorive.
”Jemi në dy vite të Qeverisjes Kurti. Sipas meje ishte luftë me të gjithë, pra luftë me të gjithë por që përfundoi në luftë me vetveten. Pra Kurti iu shpalli luftë të gjithëve, si fillim kategorive të lirisë, duke mos i përkrah me pagën minimale. I shpalli luftë të punësuarve në sektorin publik, duke mos i përkrah me rritje pagash, iu shpalli luftë të gjithë sipërmarrësve duke e mbajtë peng buxhetin e Kosovës dhe duke ndalë investimet kapitale. E vazhdoi duke i shpallë luftë edhe komuniteteve etnike e po ashtu aletatëve tonë. Rezultat i kësaj qeverisje, jo vetëm që është lodh qytetari i vendit, por ka arrit t’i lodhë edhe aleatët tanë, ata më besnik, më tradicional”, ka thënë Haradinaj.
Në një konferencë për media ai ka bërë thirrje që të implementohet sa më shpejt marrëveshja me Serbinë, pasi që sipas tij improvizimet karshi saj do t’i thellonin edhe më tej pasojat për Kosovën, transmeton teve1.info.
“Në ditën e sotme Aleanca beson se implementimi me seriozitet, situata është jashtëzakonisht serioze dhe Qeveria e Kosovës nuk duhet të bën eksperimente me obligimet që ka marrë për të implementu marrëveshjen të njohur si franko-gjermane por që është amerikane. Pra besoj që improvizimet në implementim do t’i thellojnë edhe më shumë pasojat që tashmë veç i ndjejmë si Kosovë, izolimin tonë, në planin e sigurisë do të shkaktojnë pasoja e veçanërisht në gjendjen e krijume në veri”.
“Pra i bëjmë apel Kurtit dhe Qeverisë që të jenë serioz, të mos bëjnë eksperimentime, të mos humbin kohë, por të veprojnë menjëherë në implementim të marrëveshjes në bazë të obligimeve që i ka marrë Kosova”, ka deklaruar ish-kryeministri.
