Presidenti i Serbisë, Aleksandar Vuçiq, ka thënë se gjithçka që është nënshkruar në dialogun mes Kosovës dhe Serbisë, dhe që është nënshkruar edhe nga përfaqësuesit e Bashkimit Evropian, duhet të zbatohet.
Sipas Vuçiq, kur është fjala për Asociacionin e Komunave me Shumicë Serbe, nën patronatin e BE-së, janë nënshkruar katër marrëveshje: plani i zbatimit, parimet, menaxhmenti dhe Marrëveshja e parë.
“Këto janë katër marrëveshje. Ne tashmë kemi nënshkruar gjithçka dhe natyrisht është nënshkruar nga përfaqësuesit e Bashkimit Evropian dhe duhet të zbatohet. Dhe ky nuk është qëllimi përfundimtar. Qëllimi përfundimtar është që serbët dhe shqiptarët të jetojnë së bashku,të jetojmë shumë më mirë dhe të respektojmë njëri-tjetrin, pa hasmëri. Nuk kam në plan të flas për fajin e askujt, nuk ka rëndësi nëse do të ndodhë për tre muaj apo tre vjet, por nëse ia dalim do të jetë sukses historik ”, ka thënë Vuçiq në një intervistë për Euronews, transmeton teve1.info.
I pyetur pak para takimit të Ohrit, për “vijat e kuqe”, Vuçiq ka deklaruar se nuk flet shpesh për vijat e kuqe, sepse sipas tij nëse flitet shumë atëherë nuk ka negociata reale dhe “pala tjetër do të insistojë vetëm në ato vija të kuqe”.
Është më e rëndësishme, shtoi ai, të flasin siç duhet, dhe kjo “do të thotë të përpiqesh të gjesh zgjidhje kompromisi”.
“Ne jemi të gatshëm ta bëjmë këtë. Sigurisht që të dyja palët kanë vijat e tyre të kuqe dhe nuk mund ta mohoj këtë, por ne, besoj se të dyja palët, duhet të bëjmë shumë për të normalizuar situatën mes kombeve tona, popujve tanë dhe duke e pasur këtë parasysh, besoj se në interes të të dyja palëve të sigurohet qarkullimi i lirë i mallrave, njerëzve dhe kapitalit. Duhet të punojmë me shumë zell për këtë, si dhe për zbatimin e të gjitha marrëveshjeve të mëparshme”, tha Vuçiq.
I pyetur nëse Serbia është e gatshme t’i bëjë disa lëshime palës kosovare kur bëhet fjalë për anëtarësimin në Këshillin e Evropës apo të paktën të fillojë atë procedurë, Vuçiq tha se ata “tashmë e kanë filluar atë procedurë në Këshillin e Evropës, pa pyetur Serbinë, dhe se nuk u duhet Serbia për këtë”.
