Në nëntor të vitit 2016, aktivisti i Lëvizjes Vetëvendosje, Astrit Dehari kishte ndërruar jetë në Qendrën e Paraburgimit në Prizren.
Gjashtë vjet pas, hetimet për rrethanat e vdekjes së tij po vazhdojnë.
Ministrja e Drejtësisë, Albulena Haxhiu të hënën mori vendim për shkarkimin e kryeinspektorit të burgjeve, Ylber Topalli.
“Ylber Topalli dyshohet se i ka marrë kamerat e sigurisë nga burgu i Prizrenit para Policisë dhe i ka sjellë në Ministrinë e Drejtësisë, duke tejkaluar edhe kompetencat që bartë detyra e tij, veprime të cilat kanë kontribuar negativisht drejt hetimit të drejtë të vrasjes së Astrit Deharit. Po ashtu, i njëjti ka hartuar dy raporte kontradiktore lidhur me rastin: Në njërin raport, disa ditë pas vrasjes së Astrit Deharit, kryeinspektori Topalli e ka quajtur rastin e Astritit vetëvrasje. Disa ditë më vonë, të njëjtin raport ai e mohon që është i tij edhe pse e ka vendosur nënshkrimin e tij në këtë raport”, thuhet në vendimin e Ministrisë.
Por ky i fundit po e kundërshton një vendim të tillë, pasi që siç thotë ai, është ndërmarrë me shumë shkelje ligjore.
Ai tregon se do t’i ndjekë të gjitha rrugët ligjore për të ushtruar ankesën e tij, duke besuar se është i pafajshëm.
Ndryshe, rasti Dehari së fundmi është shoqëruar edhe me një skandal, ku provat për vdekjen e tij ishin zhdukur nga Instituti i Mjekësisë Ligjore, e që më pas, disa nga to janë rikthyer në këtë objekt.
Kronika e gazetarit Lindrit Zejnullahu.
