Këto paisje të njohura si cigare elektronike, janë bërë trend për të rinjtë në Kosovë.
Përmes marketingut të tyre, është promovuar si metodë e mirë për ta lënë duhanin.
Megjithëse, në shumë vende të botës është alarmuar se konsumimi i tyre ndikon negativisht në shëndetin e njeriut, në Kosovë autoritetet ende nuk kanë ndërmarrë ndonjë veprim.
E nga ana e qytetarëve, të njëjtat janë mirëpritur, edhe pse pohojnë se janë të vetëdjshëm për pasojat.
“Të mira nuk janë për shëndetin, mirëpo janë në trend se në shumë vende është i ndalum ky duhani original e përqata edhe poi konsumojnë këto elektroniket se nuk janë të ndalume gjithkun”, tha qytetari Bajram Krasniqi.
“Ndoshta më e mirë është elektronike se duhani kështu me pi. Të mira s’janë asnjëra se krijonë shpenzime përveç interesot që ta dëmtojnë shëndetin”, tha Satbere Telaku.
“Janë të dëmshme për shëndet. Mendoj se të ne më shumë po përdoren shkaku që janë bërë trend”, tha Qendrim Berisha.
Ndërkohë, Instituti Kombëtar i Shëndetësisë Publike të Kosovës, në një përgjigjje elektronike ka shpalosur rreziqet që vijnë nga konsumimi i këtij produkti.
“Edhe pse cigaret elektronike nuk përmbajnë duhan, janë të dëmshme për shëndetin. Megjithatë, ndikimet afatgjata të përdorimit të tyre ose ekspozimit ndaj tyre janë ende duke u hulumtuar. Cigaret elektronike janë veçanërisht të rrezikshme kur përdoren nga fëmijët dhe adoleshentët. Nikotina krijon varshmëri ndërsa truri zhvillohet deri në moshën mbi njëzet vjet. Cigaret elektronike me nikotinë rrisin rrezikun e sëmundjeve të zemrës dhe çrregullimeve të mushkërive. Ato paraqesin rreziqe të konsiderueshme edhe për gratë shtatzëna që i përdorin, pasi mund të dëmtojnë zhvillimin e fetusit”, sqaron IKSHPK.
Ndërkaq, në aspektin ligjor, ligji i duhanit dhe aktet tjera normative e rregullojnë edhe çështjen e cigareve elektronike duke u bazuar në përmbajtje të produktit.
Kronika e gazetares Valëza Sylejmani.
