Zyra e Bashkimit Evropian, e ka publikuar agjendën e takimit në mes kryeministrit të Kosovës, Albin Kurti dhe presidentit të Serbisë, Aleksandar Vuçiq, i cili do të mbahet më 18 mars në Ohër të Maqedonisë së Veriut, raporton teve1.info.
Takimi do të realizohet me përfaqësuesin e lartë të BE-së, Josep Borrell dhe emisarin e BE-së për dialogun Kosovë – Serbi, Miroslav Lajçak.
Ndërmjetësuesit do të zhvillojnë takime të veçanta me liderët, pastaj një takim të përbashkët trepalësh.
Sipas Zyrës së Bashkimit Evropian, takimi do të fokusohet në finalizimin e Aneksit Zbatues të Marrëveshjes së BE-së për rrugën drejt normalizimit të marrëdhënieve ndërmjet Kosovës dhe Serbisë.
Më 27 shkurt, në Bruksel, krerët e Kosovës dhe Serbisë e kanë pranuar planin evropian, por nuk është nënshkruar pasi që presidenti serb, Vuçiq, nuk ka qenë i gatshëm.
