Deputeti i VV-së, Haki Abazi, e ka kritikuar kryeministrin e Kosovës, Albin Kurti dhe qeverinë për gjendjen ekonomike e sociale në vend, por edhe atë politike, raporton teve1.info
Përmes një statusi në Facebook, Abazi ka shkruar me ironi për deklaratat e mëhershme të kryeministrit Kurti për, siç deklaronte ai, ish presidenti i Kosovës Hashim Thaçi i ka vënë thikat mbi harta, derisa ka shtuar se tashmë kryeministri Kurti po i vë thikat pas shpine bashkëpunëtorëve të tij.
“Thaçi thikat mbi harta, Kurti thikat pas shpine të bashkëpunëtorëve- në fund Lajçaku fajtori kujdestar, e ne të gjithë figura historike edhe Oliver Ivanoviçi, bashkë me të gjithë krijuesit e shoqërisë multi në Kosovë!
Kjo është thënë para dy viteve, nuk është risi kur e ke fut bishtin mes këmbëve. “Institutet” që konstatojnë gjendje, janë autoparlant për justifikim të dështimit dhe frika që populli po e kupton që edhe ky me thika është! Lajçaku është kurban i vonuar, dështimi nuk fshehet më!
Çështja është serioze, nuk bën me u zgërdhi, njerëzit po ikin nga të “mirat, mirëqenia dhe respekti”, po ikin e po i lënë punët e trojet e tyre për profesionin e argatit në perëndim, atje ku i shërbehet parajsës së zotnisë sepse nuk duan të jenë dëshmitarët e zhgënjimit dhe falsifikimit të historisë para syve të tyre!
Vazhdojmë vazhdimin me qenin tapall në QKUK!”, ka shkruar Abazi.
Deputeti Abazi ka shprehur pakënaqësi me qeverisjen e partisë që i takon, derisa ka paralajmëruar se do të jap edhe dorëheqje.