Deputeti i Lidhjes Demokratike të Kosovës, Avdullah Hoti, është përplasur me shefen e Grupit Parlamentar të Lëvizjes Vetëvendosje, Mimoza Kusari-Lila, të enjten në seancën e Kuvendit.
Hoti reagoi pasi Kusari-Lila e akuzoi kryetarin e LDK-së, Lumir Abdixhiku, për përdorim të gjuhës mizogjene.
“Në kohën kur partia e juaj ra në 12 për qind, kur kishit ndërruar partner të koalicionit, dolët me AAK-në dhe NISMA-n dhe e latë Vetëvendosjen, ishim duke kundërshtuar shkëmbimin e territoreve dhe e rrëzuat Qeverinë Kurti. Në të gjithë këtë periudhë, lëvizjet dhe akrobacionet e partisë së juaj kanë treguar peshë shumë më të rëndë të dëmshme për Kosovën. Ju z.Abdixhiku përdorët gjuhë mizogjene ndaj një gruaje. Kam qenë në një parti, Aleanca Kosova e Re dhe pastaj në Alternativa. Gjitha këto lëvizje bëhen për ta ushqyer një gjuhë të urrejtjes ndaj gruas në politikë”, ka thënë Kusari-Lila.
Por përgjigja e ish-kryeministrit Hoti ishte e ashpër.
“Zelli i asaj për me i shërbyer shefave që i ka ndërruar vazhdimisht, është i gërditshëm. Kush i ka gjasat më të mira, kjo i shkon mbrapa. I ka shkuar PDK-së, ka ardhur te ne më 2017. Thoshte çfarë kryeministri do të jetë Hoti, kur humbëm, shkoi te partia e tjetër”, ka thënë ai.
Më pas, u kundërpërgjigj Kusari-Lila.
“Ju lumtë që për një çështje të vetme u bashkërenduat me Abdixhikun, në sulmin ndaj meje, sepse për të gjitha të tjerat vërehen kundërshtitë tuaja. Ishte shtabi juaj që ma jepte fjalën në fushata”, ka thënë ajo.
