Njohësi i proceseve politike, Tomorr Avdia ka komentuar deklarimin e presidentit serb, Aleksandar Vuçiq pas përfundimit të takimit në Bruksel me kryeministrin e Kosovës, Albin Kurti.
Sipas Avdiajt, reagimi dhe përgjigja e Vuçiqit kur u pyet se a do ta njohë Serbia Kosovën, lënë të kuptojnë se ajo e ka njohur më një gjysmë zëri Kosovën, de jure.
“Çështja kryesore që unë e pashë te konferenca për media e presidentit Vuçiq, unë e pashë një gjuhë ndryshe sepse kur u pyet drejtpërdrejt a do ta njihni Republikën e Kosovës, ai deklaroi se Serbia është anëtare e OKB-së, Kosova jo. Pra, një deklarim i tillë nga kreu i shtetit kur është në bisedime për njohjen e një shteti tjetër, i bie që është një njohje më shumë se de fakto. Është një njohje me gjysmë zëri de jure e Serbisë për Republikën e Kosovës, edhe përkundër faktit që nuk ekziston njohje e drejtpërdrejtë në dokumentin franko-gjerman”, ka thënë Avdia në Info Nata në Tëvë 1.