Lidhur me keqtrajtimin e shtetasit shqiptar, njëherit profesorit Petraq Milo, nga pjesëtarë të policisë malazeze, gazetari nga Mali i Zi, Kristian Dukaj, tha se një ngjarje e tillë nuk duhet të ndikojë në prishjen e marrëdhënieve mes Shqipërisë dhe Malit të Zi.
Sipas Dukaj, është për tu gëzuar fakti që janë ndërmarrë menjëherë veprime për arrestimin e policit në fjalë.
“Ngjarje të tilla nuk duhet të ndikojnë që të prishen marrëdhëniet mes dy shteteve. Të gjithë e dinë që Mali i Zi dhe Shqipëria kanë marrëdhënie të shkëlqyera, si në ato politike e ekonomike. Një individ nuk përfaqëson një shoqëri të tërë. Ajo që na gëzon neve, e sidomos drejtësinë, është fakti që polici në fjalë është arrestuar dhe jam i bindur që shteti malazez do ta sanksionojë atë ashtu siç e meriton”, deklaroi Dukaj në emisionin “Infonata” në Tëvë1.
Madje, Dukaj vlerësoi se në qoftë se ajo video nuk do ishte publikuar në rrjete sociale, ky rast do mbetej nën hije.
“Edhe vetë qytetarët e Malit të Zi e kanë dënuar këtë rast”, shtoi tutje Dukaj.
Ndërkaq, i pyetur se a gjykohet që mund të ketë pasur motive etnike, Dukaj tha se nuk duhet lejuar që një individ të ndikojë në marrëdhëniet mes institucioneve apo mes të dyja shteteve./teve1.info/.