Shefi i Grupit Parlamentar të AAK-së, Besnik Tahiri, ka hedhur kritika për krerët e shtetit të cilët siç tha ai, po bëjnë shumë vizita kurse nuk po sjellin asnjë projekt.
Tahiri në Facebook ka thënë se tash e dy vite të Qeverisë Kurti nuk ka ndodhur asgjë, përveç fotografive.
“Është e pabesueshme të shihet se si krerët e shtetit shkojnë në konferenca ndërkombëtare, në takime në shtete të ndryshme, në vizita bilaterale që janë të pakta, dhe për çudi e habi, nuk ka asnjë efekt, asnjë projekt, asnjë benifit për qytetarët e Kosovës.Kryeministri ishte tri javë në Amerikë, premtoi investime e korporata, por nuk ndodhi asgjë. Nuk po ndodh, tash e dy vjet asgjë, koha kur një lider i shtetit del në një fotografi dhe tregon që takoi dikë, është kohë e tejkaluar”, ka thënë ai.
Madje ai ka thënë se për dy vite qytetari i Kosovës ka marrë vetëm fjalë dhe premtime boshe.
“Secili prej nesh, ka një kohë të gjatë që e organizon një takim e bënë një fotografi, e merr një buzëqeshje e edhe një shtrëngim dore, por çka po merr qytetari i Kosovës.Për dy vite, qytetari i Kosovës po merr vetëm fjalë, premtime boshe dhe reflektim se çka ka ndodhë qe 20 vjet.E pabesueshme, por e vërtetë”, ka shtuar ai./teve1.info./
