Dialogu me Serbinë nxiti debate të ashpra në Kuvendin e Kosovës të hënën.
Fillimisht, shefi i ekzekutivit kosovar, Albin Kurti, bëri të ditur se nuk pranon një dialog që nuk përmban njohjen e ndërsjellë mes të dyja vendeve.
Kurti tha se këtë ua ka bërë të ditur edhe ndërmjetësuesve të këtij procesi.
Ndërsa, kreu i Lidhjes Demokratike të Kosovës, Lumir Abdixhiku, e quajti Kurtin kontradiktor, dhe sipas tij Kryeministri është duke e humbur qetësinë.
E kryetari i Partisë Demokratike të Kosovës, Memli Krasniqi, ka kërkuar përgjigje konkrete nga Kryeministri Kurti, për planin franko-gjerman nëse e parasheh apo jo njohjen reciproke.
Ndërkaq për kreun e AAK-së, Ramush Haradinaj, plani franko-gjerman është i pranueshëm.
Mes tjerash, Kryeministri Kurti, ka kërkuar më shumë unifikim të spektrit politik për çështjen e Asocacionit të Komunave me shumicë serbe.
Në reagimin ndaj opozitarëve i pari i qeverisë tha që fjalën popullit, shtetit dhe dëshmorëve ia kanë shkel ata që votuan Zajednicën
Pasi kryeministri Albin Kurti e lëshoi seancën, opozita kërkoi pauzë derisa ai të kthehet.
Pas më shumë se një orë pauzë, kryeministri nuk u kthye andaj opozita vendosi që seanca të mos vazhdojë me zëvendëskryeministrin Besnik Bislimi.
Kronika e gazetarit Shpat Blakçori.