Deputetja e AAK-së, Time Kadrijaj po pretendon se një konvoj me ndihma nga Shqipëria, i cili ishte nisur për t’i ndihmuar qytetarëve në Skenderaj të prekur nga vërshimet, është ndalur dhe kthyer prapa.
Për të marrë sqarime për këtë, ajo i ka bërë pyetje publike kryeministrit Kurti.
“Dhe ajo që më shqetëson më së shumti kryeministër, Qeveria i ka bo një kërkesë institucioneve në Shqipëri që ta ndihmojnë Kosovën. Dhe ne kemi pa që janë nis kolona të gjata me njerëz që kanë dashtë të vijnë dhe të ndihmojnë në Skenderaj për situatën e krijuar nga vërshimet. Dhe pse z. Kryeministër, pse u ndal kolona me ndihma nga Shqipëria në kufi dhe nuk u lejun të hyjnë në Kosovë? A keni ndonjë përgjigje, a mund ta sqaroni para deputetëve dhe para popullit se cili ishte qëllimi i ndalimit të konvojit të Shqipërisë për t’i ndihmuar qytetarët gjatë vërshimeve, nuk u lejua të hyjë në Kosovë”, ka thënë ajo.
Sipas saj kryeministri po lë të kuptohet se nuk i intereson për komunat në të cilat nuk qeveris VV-ja.
“A ishte në nivel detyre Qeveria e Kosovës kur e vizitoi Skënderajn dhe cila është përkrahja e Qeverisë së Kosovës për këta qytetarë të cilët në këto ditë me acar kanë ngel në qiellin e hapur. A e ka zgjatë dorën Qeveria për t’i ndihmuar këta qytetarë? Kjo kryeministër nuk është e njëjtë sepse njëjtë vepruat edhe me Deçanin dhe kjo po lë me kuptu se t’i në ato vende ku nuk qeveris vet, nuk të intereson për qytetarët. U dashtë të jeni më kompetent për të ndihmuar qytetarët e Skenderajt dhe me pa cilat janë pasojat, sa është numri i qytetarëve që kanë mbet pa ngulm mbi kokë dhe ku janë vendos. Sepse janë qytetarë të Kosovës dhe si kryeministër ki përgjegjësi ndaj tyre”, ka shtuar Kadrijaj.
