Kryetari i Lidhjes Demokratike të Kosovës, Lumir Abdixhiku ka paraqitur propozimin e kësaj partie për vlerën e koeficientit të pagave për sektorin publik.
Ai ka thënë se ky propozim është i mundshëm për t’u realizuar pasi merr vetëm 120 milionë euro shtesë, shumë kjo e cila është më e vogël sesa shuma që ka ndarë Qeveria Kurti për Pakot për Rimëkëmbje Ekonomike.
“Propozimi ynë është i drejtë sepse merr për bazë inflacionin rekord që e kemi patur në vend. Propozimi ynë është i mundshëm sepse merr 120 milionë shtesë, shumë më pak se që ka shpenzuar Qeveria në pako që nuk kanë lënë as edhe një shenjë. Propozimi ynë është i qëndrueshëm sepse pagat si proporcion buxhetor i mbanë nën 27%. Propozimi ynë është i denjë sepse krijon paga të dinjitetshme si asnjëherë më parë në vend. Zgjidhja është e qartë. Koeficienti 125”, ka shkruar Abdixhiku.
Qeveria e Kosovës të mërkurën ka prezantuar vlerën e koeficientit të pagave, prej 105 eurove. /Teve1.info/
