Ambasada e Italisë në Kosovë i është bashkangjitur thirrjes së ambasadës amerikane, që tani është koha që Kosova ta themelojë Asociacionin e komunave me shumicë serbe.
Siç thuhet në njoftimin e tyre, përkushtimi i Kosovës për ta krijuar Asociacionin nuk e cenon Kushtutetën apo kërcënon sovranitetin e saj, përcjell teve1.info
“Përkundrazi, duke e zbatuar atë, Kosova do të bëjë një hap kritik për të ndërtuar të ardhmen e saj si një vend multietnik, i integruar në strukturat euroatlantike”, thuhet në njoftimin e tyre.
Derek Chollet, Këshilltar i Departamentit të Shtetit të SHBA-së dhe Gabriel Escobar, i dërguari special i SHBA-së për Ballkanin Perëndimor, kanë thënë se koha për themelimin e Asociacionit të Komunave me shumicë serbe në Kosovë është tani.
Sipas tyre, duke punuar për themelimin e Asociacionit “Kosova do të realizojë një element kritik të nevojshëm për të ndërtuar të ardhmen e saj të drejtë si një vend sovran, multietnik dhe i pavarur, i integruar në strukturat euroatlantike”.
Sot është mbajtur takimi i thirrur nga Ambasada amerikane në Prishtinë, ku u diskutua për Asociacionin.
Pas këtij takimi, ambasadori amerikan, Jeff Hovenier u është shprehur mirënjohës palëve të pranishme për pikëpamjet e tyre të treguara, teksa theksoi se duhet të zbatohen të gjitha angazhimet e dialogut.
Në këtë takim të pranishëm ishin ambasadori britanik, Nicholas Abbott si dhe shefi i Bashkimit Evropian në Kosovë, Tomas Szunyog.
Po ashtu morën pjesë edhe ministri i Shëndetësisë, Arben Vitia, ministrja e Arsimit, Arbërie Nagavci nga Lëvizja Vetëvendosje, si dhe ministrja e Punëve të Jashtme, Donika Gërvalla.
Zyra e Kryeministrit u përfaqësua nga shefi i stafit të kryeministrit Albin Kurti, Luan Dalipi. Zyra e Kryeparlamentarit nga shefi i stafit të kryeparlamentarit Glauk Konjufca, Ilir Kërqeli. Ndërsa, nga Presidenca ishte Blerim Vela. /Teve1.info/
