Në kuadër të kësaj, përfaqësuesi i Posaçëm i Bashkimit Evropian për dialogun Kosovë – Serbi, Miroslav Lajçak, ka nisur një turne takimesh me vendet e BE-së që nuk e kanë njohur Pavarësinë e Kosovën.
Politologu Dritëro Arifi thotë se me përfundimin e dialogut pesë vendet mos-njohëse mund ta shqyrtojnë njohjen e pavarësisë së Kosovës.
“Lajcak tani ka edhe një obligim shtesë që të paktën të mundohet t’i përafroi qëndrimet e vendeve mos-njohëse pra siç është Greqisë, Sllovakisë, Rumanisë, Qipros dhe Spanjës në rastin e Kosovës se ai ata është duke i informuar që dialogu është duke vazhduar edhe është në përfundim e sipër. Pra, këto shtet po supozoj që presin përfundimin e dialogut, shumë shpejtë që edhe ato të hynë në atë rrugëtimin e njohjes së Kosovës. Kjo do të merr kohë normalisht”, tha Arifi.
E njohësi i çështjeve politike, Melazim Koci, thotë se mesazhi i vizitave të Lajçakut, flet për relativizmin e peshës së Serbisë në rajon.
“Mesazhi në përgjithësi është ky, është relativizu pesha politike e Serbisë. Do të thotë, Kosovës i duhet njohja nga pesë vendet e Bashkimit Evropian, që t’i hapet rruga për integrime euroatlantike. Njohja e Serbisë në këto rrethana nuk paraqet absolutisht asnjë rëndësi. Do të thotë nga loja praktikisht është përjashtuar Serbia. Me njohjen eventuale nga këto pesë vende, Kosova ka gjasa shumë reale që në një periudhë pak më të gjatë të anëtarësohet në Bashkimin Evropian”, deklaroi Koci.
Arritja e një marrëveshjeje finale në vazhdimësi është komentuar si mundësi për avancimin e Kosovës në rrugën e saj euro-atlantike.
Kronika e gazetarit Valmir Gallopeni.
