Misioni i tyre është i qartë, të avancojnë procesin e dialogut mes Kosovës dhe Serbisë.
Ndërmjetësuesit Mirsolav Lajçak dhe Gabriel Escobar, do t’i shoqërojnë edhe tre këshilltarët e jashtëm të kancelarit gjerman, Olaf Scholz, presidentit francez, Emmanuel Macron dhe kryeministres italiane, Giorgia Meloni.
E pavarësisht dinamizmit të dialogut, Profesori nga Westminster University, Aidan Hehir, shprehet skeptik se Vuçiq është i hapur për një marrëveshje me Kosovën.
“Jo, kryesisht sepse pozicioni i Serbisë duket se është bërë më luftarak kohët e fundit. Pasi Vuçiq e përshkroi Kurtin së fundmi si “llum terrorist”, provokoi serbët në akte dhune në komunat veriore të Kosovës dhe dërgoi forcat serbe në zonën kufitare, Vuçiq ka sinjalizuar synimet e tij për të përshkallëzuar dhe jo për të zgjidhur tensionet me Kosovën”, tha Hehir.
Tutje, britaniku thotë se serbët në Kosovë kanë shumë të drejta dhe nuk e sheh të arsyeshme që të krijohet një autonomi në Veri të Mitrovicës.
Sipas tij qëllimi kryesor i Vuçiqit është të ndërhyjë në punët e brendshme të Kosovës.
“Kushtetuta e Kosovës u siguron komuniteteve pakicë, veçanërisht serbëve, të drejta të gjera. Si e tillë, nuk ka asnjë bazë për të pretenduar se serbët në Kosovë kanë nevojë për të drejta shtesë. Sigurimi i autonomisë më të madhe të serbëve në komunat me shumicë serbe në veri të Kosovës nuk do të përmirësojë të drejtat apo kushtet materiale të serbëve që jetojnë atje; përkundrazi, thjesht do të shërbejë si një mjet me të cilin Beogradi mund të ndërhyjë më tej në punët e brendshme të Kosovës dhe të minojë aftësinë e qeverisë qendrore për të zbatuar politikat e saj dhe për të ruajtur rendin dhe ligjin”, shtoi ai.
Ndërkaq analisti politik, Tomor Avdia, vlerëson se procesi i dialogu ka hyrë në një fazë kritike, prandaj siç thotë ai Qeveria e Kosovës, duhet vepruar me kujdes e të mos nënshkruajë ndonjë marrëveshje të dëmshme.
Diplomatët evropianë dhe ata amerikanë në mëngjesin e së premtes, do të pritet nga kryeministri i Kosovës, Albin Kurti.
Ndërsa pas takimeve në Prishtinë do të udhëtojnë për në Beograd ku do të zhvillojnë takime edhe me presidentin e Serbisë, Aleksandar Vuçiq.
Kronika e gazetarit Shpat Blakçori.
