Sa i përket propozimit franko-gjerman Zulfaj ka thënë se është bazë e mirë për marrëveshje.
“Sigurisht që kryeministri e ka thënë që është bazë e mirë për diskutim dhe ka përbrenda parime që janë edhe vlera sikurse integriteti territorial e pavarësia”, ka thënë Zulfaj në “Këndin e Debatit” në Tëvë 1.
Zulfaj ka shtuar se njohja në qendër duhet të jetë rezultati përfundimtar i dialogut. Sipas tij, këtë e thotë edhe Këshilltari i lartë i Departamentit Amerikan të Shtetit.
“E pamë edhe deklaratën e Derek Chollet që njohja duhet të jetë në qendër dhe është që ne e kemi deklaruar vazhdimisht është se njohja është në qendër dhe ky duhet të jetë rezultati përfundimtar i bisedimeve”, ka shtuar ai.
Tutje ai ka thënë se asociacioni nuk mund të jetë parakusht për arritjen e një marrëveshje pasi ajo nuk e ka kaluar testin e Gjykatës Kushtetuese.
Zulfaj ka thënë se Kosova është e interesuar që marrëveshja të përfshijë të drejta reciproke të minoriteteve.
“Ne jemi të interesuar të flasim për të drejtat reciproke të minoriteteve, ku duhet të ketë edhe një balancë të tyre. Kjo nënkupton pra të drejtat e minoriteteve që nuk janë vetëm të komunitetit serb në Kosovë, por edhe të komunitetit shqiptar në Serbi. Duhet të shohim çka ofron kushtetuta e Serbisë për minoritetet dhe çka kushtetuta jonë për minoritete. Ne sa i përket kësaj pjese kemi kushtetutën më të avancuar në rajon”, ka vazhduar ai.
