Vuçiq tha se Profesori amerikan paguhet nga lobi shqiptar, pa ofruar ndonjë dëshmi për këto akuza.
Këto deklarata të Presidentit serb, nxiten reagime të mëdha në opinionin publik.
I menjëhershëm ishte reagimi nga Departamenti Amerikan i Shtetit, ku përmes rrjetit social Twitter, deklaruan se nuk ka vend në shoqëritë demokratike për taktikat e njollosjes kundër qytetarëve, sikurse ato që janë përdorur ndaj Edward Joseph.
E lidhur me këtë ngjarje, profesori amerikan ka folur për Tëvë1.
Ai thotë se reagimi i Departamentit Amerikan të Shtetit është shumë i rëndësishëm për të gjithë zërat e pavarur, e veçanërisht për ata në Serbi të cilët ndihen të intimituar nga Presidenti serb.
“E përshëndes reagimin e fuqishëm të Departamentit Amerikan të Shtetit ndaj këtyre akuzave të rreme që u bënë ndaj meje nga Presidenti i Serbisë, Aleksandar Vuçiq. Edhe më inkurajuese është se në atë reagim mbrohen të gjithë zërat e pavarur, nuk ka të bëjë kjo çështje vetëm me mua. E kuptoj që këto veprime bëhen nga liderë të cilëve nuk iu pëlqen kritika. Shpresoj që ky reagim nga Departamenti Amerikan i Shtetit do t’i inkurajoj edhe zërat e pavarur në Serbi, të cilët ndjehen të intimituar”, ka thënë Joseph.
Tutje, Edward Joseph, tregoi edhe për disa akuza të tjera që i bëri Aleksandar Vuçiq në drejtim të tij.
Ky i fundit akuzoi profesorin amerikan, se nuk i deklaron të hyrat.
“Nuk është hera e parë që Aleksandar Vuçiq më sulmon mua, jam kritikuar edhe më herët të jem i sinqertë me ju. Por në këtë rast ishte më ndryshe, ju mund ta shihni intervistën dhe mënyrën se si ai i thotë këto akuza duke ma përmendur emrin. Ai bëri edhe një akuzë tjetër të rëndë duke thënë se unë nuk i raportoj të hyrat e mia. Kjo është shkelje e ligjit amerikan. Ne e dimë qëgazetarët, aktivistët dhe pjesëtarët e shoqërisë civile nuk ndihen të lirë në Serbi, disa prej tyre madje edhe janë sulmuar fizikisht. Prandaj, ky reagim është i mirëseardhur”, ka thënë Joseph.
Në postimin e Departamentit Amerikan të Shtetit ligjëruesi Joseph ishte së bashku me ndihmëssekretarin amerikan të Shtetit për Evropën dhe Euroazinë, Gabriel Escobar.
Kronika e gazetarit Shpat Blakçori.
