Haradinaj në një konferencë për media, tha se veprimet e kryeministrit të Kosovës, Albin Kurti në këta tre muajt e fundit e kanë bërë situatën më të rëndë, teksa u drejtua duke thënë se KFOR-it nuk mund t’i vendosësh kurrfarë afatesh.
“Platforma luftënxitëse e Vuçiqit dhe njerëzve të tij të instaluara në veri po i kalon vijat e kuqe. Ai duhet urgjentisht t’i tërheq njerëzit e tij nga veriu dhe të urdhërojë heqjen e barrikadave dhe të kthehet në tryezën e bisedimeve. Fatkeqësisht as Kurti dhe njerëzit e tij nuk janë duke vepruar drejtë. Veprimet dhe deklarimet e pamatura të tyre në vazhdimësi e specifikisht në këta tre muaj veç sa e kanë bërë situatën më të rëndë. Misioni paqeruajtës i NATO-s KFOR në Kosovë nuk është palë, prandaj nuk mund të konsiderohet si i tillë. Nuk mund t’i vendosësh kurrfarë afatesh apo kushtesh KFOR-it. Misioni i tyre në Kosovë është i qartë dhe i pastër si loti”, ka deklaruar ai.
Ai thotë se Kurti duhet të heq dorë nga retorika kundërshtuese e kushtëzuese ndaj aleatëve, teksa pati edhe një kërkesë për serbët e Kosovës.
“Palë në Kosovë nuk janë as Washingotni e as Brukseli, ata janë aleat të paqes dhe sigurisë në Kosovë kryeministri duhet të heq dorë nga retorika kundërshtuese e kushtëzuese ndaj tyre. Kam një kërkesë edhe për serbët e Kosovës të mos bien pre e kalkulimeve politike të askujt e as Vuçiqit. E ardhmja e tyre është në Kosovë, prandaj largohuni nga barrikadat”, përfundoi Haradinaj.
Ditë më parë, kryeministri i Kosovës, Albin Kurti në një intervistë për mediumin boshnjak “istraga.ba”, ka thënë se “nëse KFOR-i s’është në gjendje t’i heqë barrikadat, ose për arsye të panjohura për mua, nuk do t’i heqë, atëherë ne do ta bëjmë këtë”/Teve1.info/