Laura Fazliu ka arritur të mërkurën njërin prej sukseseve më të mëdha në karrierë. Nënkampionia evropiane ka fituar medaljen e argjendtë në Mastersin e xhudos që po mbahet në Jerusalem.
Xhudistja 22-vjeçare nuk ishte bartëse në kategorinë deri 63 kilogramë. Por ka shënuar plot katër fitore, të gjitha ndaj top-xhudisteve botërore, për të fituar medaljen e argjendtë. Me të argjendtën në Masters, Laura ka fituar 1200 pikë në ranglistën botërore dhe ka bërë hap të madh drejt kualifikimit në Lojërat Olimpike “Parisi 2024”. Për të është medalja e parë në garat Masters, që mbahen një herë në vit.
Laura në finale u mposht nga Miku Takaichi e Japonisë. Takaichi ka dy medalje të argjendta e dy të bronzta botërore. Laura zhvilloi luftë të fortë, por përvoja e japonezes erdhi në shprehje në aksionin vendimtar.
Të martën, Distria Krasniqi fitoi të artën, ndërsa Nora Gjakova u rendit e pesta. Të enjten në Masters garon Loriana Kuka në kategorinë deri 78 kilogramë. Kjo është gara e fundit e madhe e vitit. Dhe natyrisht, tashmë shumë e suksesshme për Kosovën.
