Përmes një statusi në Facebook, Krasniqi ka kërkuar plotësimin e kushteve të policëve në veri të vendit dhe siç ka thënë ai, kthimin e normalitetit dhe garantimin e sigurisë për të gjithë qytetarët.
“Për kë bie këmbana?
Në pjesën veriore të Kosovës po ndodhë pikërisht ajo që kemi paralajmëruar ditë më parë dhe, e cila, në asnjë mënyrë nuk guxon të ndodhë. Barrikadat po kthehen në përditshmëri para syve të Qeverisë. Vetëm pse Qeveria po heshtë dhe po e injoron si fakt, kjo nuk do të thotë se në pjesën veriore nuk po krijohet një realitet i ri. Për ata që kanë veshë për të dëgjuar, e sy për të parë, këmbana po bie. Fuqishëm. Zëshëm”, ka shkruar Krasniqi ndër të tjera.
Krasniqi ka kërkuar që të mos bëhen kompromise.
“Vështrimi nga larg nuk është zgjidhje. Kompromiset e mëtutjeshme, edhe më pak. Ushtrimi i sovranitetit dhe i shtetit ligjor, si dhe funksionimi i institucioneve të Republikës së Kosovës në tërë territorin e vendit kërkojnë veprim të menjëhershëm dhe konsistent institucional. Barrikadat duhet të hiqen pa asnjë vonesë”, ka shkruar Krasniqi.
