Një ditë pasi krerët më të lartë të shtetit nënshkruan këtë dokument, ai iu dorëzua vendit që udhëheq me presidencën e BE-s, Çekisë.
Aplikimi u bë në Pragë, ndonëse qendrat kryesore të BE-së gjenden në Bruksel.
Sipas njohësve të integrimeve evropiane, është praktikë që aplikimi për anëtarësim të dorëzohet në vendin që udhëheq me BE-në.
“Ai aplikim duhet të dorëzohet te shteti që e ka kryesinë e Këshillit të Bashkimit Evropian, që në rastin tonë këtë vit e ka pasur Çekia. Për këtë arsye nuk ka prapavijë tjetër pse aplikimi sot është dorëzuar te kryeministri Kurti në Çeki”, tha Lirika Agusholli – Berisha, hulumtuese në GLPS
E sipas profesorit në Universitetin e Uinchesterit, Seb Bytyçi, aplikimi në Pragë jep një lloj garance se dokumenti do të trajtohet më seriozisht.
“Presidenca çeke ka qenë mjaft e suksesshme, sidomos sa i përket Ballkanit Perëndimor në avancimin e çështjeve, avancimin e liberalizimit, mënyra se si është menaxhu çështja e liberalizimit ka qenë mjaft e mirë nga presidenca çeke. Gjithashtu edhe statusi i kandidatit për Bosnjën. Kështu që mendoj se kemi të bëjmë me një njohje të angazhimit por gjithashtu edhe një lloj sigurie se nuk do të mbetet nëpër kancelari të ndryshme aplikacioni por do të trajtohet më urgjentisht”, tha Bytyçi.
Kosova ka marrëveshje kontraktuale me Bashkimin Evropian që nga nënshkrimi i Marrëveshjes së Stabilimizit Asocimit më 2015, teksa në proceset integruese është vendi i fundit në Ballkanin Perëndimor.
Kronika e gazetarit Gojart Jashari.
