Këtë aplikim, Kurti ia dorëzoi ministrit për Çështje Evropiane të Çekisë, Mikuláš Bek.
Një ditë më parë, krerët shtetërorë, përfshirë kryeministrin Kurti, presidenten Vjosa Osmani dhe kryetarin e Kuvendit, Glauk Konjufca kanë nënshkruar aplikimin për anëtarësim në BE. Të njëjtit e kanë konsideruar këtë si moment historik për t’i hapur rrugë integrimit të Kosovës në Bashkimin Evropian.
Ky aplikim është mirëpritur nga zëdhënësja e Komisionit Evropian, Ana Pisonero, e cila ka thënë se Kosova ka një perspektivë të qartë evropiane dhe se BE-ja e mbështet Kosovën në rrugën e saj drejt BE-së.
Ndërkaq edhe eurodeputeti austriak, Lukas Mandl ka deklaruar se nënshkrimin e aplikimit për anëtarësim në BE, Kosova e ka bërë në kohën e duhur.
Pas aplikimit për anëtarësim në BE, Kosova në vijim duhet të kalojë edhe nëpër tre faza kryesore: në marrjen e statusit kandidat, negociatat e anëtarësimit dhe ratifikimin e traktatit.
Pasi që zyrtarët çekë udhëheqin Presidencën e BE-së, pas dorëzimit të aplikimit, do të informojnë 26 vendet tjera anëtare për këtë vendim të Kosovës. Kjo pritet të ndodhë javën e ardhshme në një takim që mbahet në nivel të ambasadorëve.
Nga 1 janari, presidencën e BE-së do ta marrë Suedia, e cila pastaj do merret me këtë çështje.
Kosova mbetet vendi i vetëm në rajon që ende nuk ka fituar liberalizimin e vizave. Ndërsa që ka të nënshkruar Marrëveshjen e Stabilizim Asocimit me BE-në. /Teve1.info/
