Kryeministri Rishi Sunak shprehu dhimbjen e tij për emigrantët që humbën jetën, ndërsa u zotua ti sjellë kontrabanduesit para drejtësisë.
“Ata duhet të identifikohen dhe të sillen para drejtësisë. Jam i sigurt që i gjithë parlamenti ndan me mua dhimbjen për përmbysjen e një varke të vogël në Kanal në orët e para të mëngjesit të sotëm tragjik . Lutjet tona shkojnë për të gjithë ata që janë prekur nga ky rast dhe nderimet tona shkojnë për ata që janë përfshirë në operacionin e gjerë të shpëtimit”, tha Sunak, shkruan AP.
Autoritetet britaneze njoftuan se hetimet janë duke vazhduar dhe se do të japin informacione të mëtejshme në kohën e duhur.
Qeveria britanike ka qenë nën presion për të ndaluar njerëzit që të paguajnë kontrabandistët për të kaluar disa nga korsitë më të ngarkuara të transportit në botë me anije të dobëta.
Por numri i njerëzve që zgjedhin të bëjnë këtë udhëtim të rrezikshëm vazhdon të rritet.
Kryeministri Rishi Sunak u zotua të martën të pastrojë një numër të madh kërkesash për azilkërkues dhe njoftoi masa të reja që synojnë të frenojnë numrin e emigrantëve që arrijnë në Mbretërinë e Bashkuar.
Sunak tha se do të fokusohet gjithashtu në largimin e shpejtë të numrit në rritje të emigrantëve shqiptarë që kanë mbërritur përmes Kanalit./Tëvë1/