Sipas një komunikate për medie të lëshuar nga Oda Amerikane në Kosovë, Hovenier kërkoi nga kjo Odë që të luajë rol udhëheqës në shoqërinë e Kosovës për të mundësuar eliminimin e barrierave në zhvillimin profesional dhe pengesave me bazë gjinore.
“Ambasadori Hovenier mirëpriti përpjekjet e Kosovës për luftimin e korrupsionit, duke shtuar se Qeveria e SHBA-së është e përfshirë në përkrahjen e këtyre përpjekjeve, duke përfshirë edhe rolin aktiv të USAID-it në themelimin e gjykatës komerciale.
Në fund, ambasadori falënderoi bizneset për ndihmën në avancimin e vizionit të përbashkët për një Kosovë sovrane, të pavarur, të suksesshme dhe prosperuese, që është mision i përbashkët i
Ambasadës së SHBA-së dhe i Odës Ekonomike Amerikane në Kosovë”, thuhet në komunikatën ë lëshuar nga Oda Amerikane.
Hovenier ndër të tjera tha se termocentralet e vjetra në Kosovë kanë ndikim në tërheqjen e investitorëve potencial.
“Duke folur për diversifikimin e energjisë, ambasadori Hovenier tha se termocentralet e vjetra të Kosovës kanë ndikim të rëndësishëm në parashikueshmërinë e furnizimit me energji, në shëndetin e qytetarëve, dhe në tërheqjen e investitorëve potencialë”, thuhet në komunikatë.
Sa i përket sektorit privat, Hovenier tha se pjesëtarët e këtij sektori luajnë rol të rëndësishëm në adresimin e tri sfidave të ndryshme si: diversifikimin e energjisë, fuqizimin ekonomik për të gjithë, dhe sundimin e ligjit.
“Ambasadori Hovenier theksoi rëndësinë e fuqizimit gjithëpërfshirës ekonomik, duke nënvizuar se 16 ditët e aktivizmit kundër dhunës gjinore. Ambasadori Hovenier tha se kur gratë gëzojnë mundësitë e barabarta të garimit në biznes, atëherë ato performojnë shumë mirë. Ambasadori that shoqëria përfiton nga diversiteti më i madh në qeveri, institucionet shoqërore, dhe komunitetet e biznesit”, thuhet në njoftim.
Ambasadori Hovenier këto deklarime i bëri gjatë fjalimit në Gala Darkën e Bamirësisë të Odës Ekonomike Amerikane në Kosovë.