Kryetari i Komisionit Qeveritar për Persona të Zhdukur, Andin Hoti, tha se çdo ditë po punohet që fati i të zhdukurve të zbardhet, mirëpo shtoi se institucionet nuk po mund të bëjnë më shumë për shkak të mos bashkëpunimit të Serbisë.
“Tash e 23 vitet u mohohet e drejta. Kurrë mu ndal jo, kurrë me i humb shpresat, ne do të punojmë, po punojmë sa po mundemi, por jo sa duhet. Kaq është mundësia jonë kaq është informata që ne e marrim. Urojmë që Serbia të thyej mendësinë dhe të bëjë zgjidhje në këtë çështje të ndjeshme”, tha Hoti.
Kurse Bajram Qerkini nga Qendra Burimore për Persona të Zhdukur, bëri thirrje për zbardhje të fatit të të zhdukurve, duke shtuar se njëherë e mirë duhet të ketë një vendim në lidhje me këtë çështje.
Këto deklarime u bënë gjatë ekspozitës “Gjithë lotët tabnë” të organizuar nga Qendrës Burimore për Persona të Zhdukur dhe “Integra”.
Kjo ekspozitë u dedikohet rrëfimeve të viktimave të luftërave në rajon dhe ka për qëllim të njoftoj publikun e gjerë me rrëfimet e tyre duke shërbyer kështu edhe si thirrje për përkrahje për viktimat dhe grupet e tjera të prekura, në kërkimin e tyre për të vërtetën dhe drejtësinë.
Ekspozita përbëhet prej 34 fotografive origjinale, të bëra nga fotografët Atdhe Mulla, Arbnora Memeti, Nake Batev dhe Borislav Pesiç.
Këto fotografi paraqesin aspekte të luftërave në ish-Jugosllavi – fotografi familjare të të pagjeturve, vende të krimeve, varreza masive, persona të zhvendosur brenda vendit dhe memoriale, por gjithashtu edhe pasojat e stërzgjatura të konflikteve që ndjehen edhe sot, duke treguar tërë tragjedinë dhe kompleksitetin e luftës.
Kjo ekspozitë është pjesë e aksionit “Fuqizimi i zërave gjithëpërfshirës të viktimave, transformimi i narrativave” zbatuar nga Integra, Lëvizja për Paqe PAX, Qendra Ndërkombëtare për Drejtësi Tranzicionale (ICTJ), Iniciativa e Re Sociale (NSI), Iniciativat Qytetare (CI), dhe Aksioni Paqësor (PA), mbështetur nga Bashkimi Evropian./EO/
