“I dënojmë incidentet e dhunshme dhe sulmet. BE-ja bën thirrje për përgjegjësi dhe shtensionim, për të mirën e popullatës lokale. EULEX-i dhe KFOR-i janë prezent në terren dhe vazhdojnë patrullimin dhe monitorimin e situatës”, u shpreh Stano në një konferencë me gazetarë të premten.
Sipas Stanos, fokusi duhet të jetë në normalizimin e raporteve Kosovë-Serbi.
“Normalizimi i raporteve Kosovë–Serbi është qenësore për rrugën evropiane për të dyja vendet, e edhe për qetësimin e situatës, dhe për shtensionim, diçka që BE-ja e ka thënë vazhdimisht e edhe kohën e fundit, në samitin e Tiranës”, tha ai.
Në lidhje me sanksionimin e nënkryetarit të Listës Serbe, Milan Radojiçiq, nga Mbretëria e Bashkuar, Stano tha se BE-ja nuk i diskuton në publik këto çështje.
“Sa herë që vjen puna te sanksionet, ju e dini që sanksionimi është diçka që nuk e diskutojmë publikisht, për sa i përket diskutimeve të mundshme, sugjerimeve propozimeve të mundshme, është diçka që nuk do të komentoj, por mund të përsëris se BE-ja dhe shtetet anëtare që janë përgjegjëse për të vendosur për çdo masë kur kemi të bëjmë për çështje të tilla, po e shikojnë situatën shumë për së afërmi dhe po e përcjellin atë, dhe e dinë shumë mirë kush çka bën. Nëse do të duhet konsensus që do të na duhet të bëjmë diçka për persona specifikë, atëherë shtetet anëtare do të diskutojnë dhe vendosin. Por s’më përket mua të spekuloj për këtë çështje”, theksoi Stano.
