Haxhiu tha se për ndërtimin e këtij stadiumi ishte ndarë edhe buxheti në vitin 2019, buxhet ky i cili ishte zvogëluar më 2020 dhe 2021, derisa këtë vit sipas tij planifikimi për investime kapitale për këtë projekt nuk figuron fare.
“Më 14 .6.2019 nga ministria që udhëhiqni është prezantua stadiumi 30 mijë ulëse në afërsi të aeroportit “Adem Jashari” i cili ishte paraparë të ketë edhe fusha ndihmëse. Projekti më i madh i infrastrukturës sportive. Fillimi i ndërtimi ishte paraparë të ndodh më 2020, dhe tash edhe pas 2 viteve ai projekt nuk ka fillu. Mjetet buxhetore janë bartur nga 2019 në 2020, nga 2020 në 2021, kurse këtë vit është larguar tërësisht nga insvesitmet kapitale. Pse është ndërprerë realizimi i këtij projekti? Janë shpenzuar 1.5 milion euro për studim fizibilitetit”, tha Haxhiu.
Mirëpo një gjë të tillë e kundërshtoi ministri Hajrulla Çeku.
Sipas këtij të fundit, projekti për këtë ka qenë vetëm një projekt ideor.
Çeku tha se për shkak të parregullsive, ky projekt është përcjellë edhe në Prokurorinë për Krime Ekonomike.
“I njëjti studim vitin e kaluar është përcjellë për shkak të dyshimeve në krimet ekonomike dhe presim përgjigje. Zhvillimi i procedurave do të kërkonte rreth 2 vite kohë dhe pastaj realizimi 3-4 vite. Kjo është pasaktësia e parë. Po ashtu ndarjet buxhetore për vitet që i referoheni flasin për qasje joserioze i cili sipas vlerësimit do të arrin shumën e 120 milion eurove”, tha ministri duke e demantuar Haxhiun.
Ky i fundit megjithatë insistoi se projekti ndodhet në sirtarët e Ministrisë së Kulturës dhe kërkoi sqarime për ndërprerjen e tij.
