Sipas Xanit, procesi më i rëndësishëm do jetë votimi i këshillit të ministrave, teksa shtoi se nuk përjashtohet mundësia të ketë pengesa.
“E rëndësishme është ajo që është bërë nga grupi punues, është pranuar nga ambasadorët dhe aty përcaktohet harta dhe të gjitha kanalet që do kemi në proces të liberalizimit të vizave. Hapi tjetër është takimi trepalësh të cilët do bëjnë marrëveshje mes vete. Aty kryesisht mund të bëhen marrëveshje teknike. Pastaj kemi miratimin në Parlamentin Evropian, aktet ndërligjore të cilat do hartohen nga institucionet e BE-së. Ndërsa, procesi më i rëndësishëm është votimi i Këshillit të Ministrave, i cili paraprakisht është një proces final. Ka mundësi për pengesa, por në qoftë se ka vullnet mund të kalohen”, ka deklaruar Xani në emisionin Tëvë1.info.
I pyetur se ku është rreziku më i madh potencial për zgjatje të procesit, Xani tha se rreziku ekziston në çdo hap, raporton teve1.info.
“Procesi i liberalizimit të vizave tanimë është i ndërlidhur shumë me proceset e tjera politike dhe nuk është më me kritere teknike”, theksoi tutje Xani.
Madje, ai u shpreh se një veprim i njëanshëm i Kosovës i cili nuk u pëlqen vendeve të Bashkimit Evropian, mund të pësojë me largim nga agjenda dhe me vonesa.
“Është e vështirë të garantojmë që do kemi një proces të drejtë duke llogaritur në të kaluarën”, tha Xani tutje.
Ndërkaq, sa i përket dialogut Kosovë-Serbi, Xani vlerësoi se në rastet më të mira finalizimi i marrëveshjes mbase do duhej të ndodhte në vitin 2024.
“Në momentin që është përmendur shtyrja e liberalizimit të vizave, në një farë mënyre reagimi i masës ishte më i lartë. Prandaj, presioni u rrit më shumë ndaj Qeverisë që të ketë kompromise dhe të ketë lëshime në tavolinë me Serbinë. Kjo për shkak se po humbnin disa procese të rëndësishme për interesin qytetar të Kosovës”, tha më tej Xani.
Kujtojmë se ambasadorët e shteteve anëtare të Bashkimit Evropian sot janë pajtuar për t’i dhënë mandatin Këshillit Evropian që të negociojë procesin e liberalizimit të vizave për Kosovën me Parlamentin Evropian./teve1.info/.
