Mirëpo, kujtojmë se në mesin e tyre nuk është Lista Serbe, subjekti kryesor politik i serbëve të Kosovës.
“Ajo që duhet të përmendet është që e kemi procesin zgjedhor i cili po vazhdon dhe subjektet politike tashmë i kanë emëruar kandidatët. Procesi atje do zhvillohet normalisht. Nuk është hera e parë, ka pasur shumë palë zgjedhje në veri dhe në të njëjtën frymë do vazhdojë edhe ky proces”, deklaroi Fejza në emisionin “Ditari” në tëvë1.
Më tej, Fejza foli edhe për mundësinë se a mund të konsiderohen zgjedhje të plota demokratike pa Listën Serbe e cila nuk ka pranuar të aplikojë si kandidat.
“Për aq kohë sa nga ana e KQZ-së dhe nga ana e institucioneve nuk ka pasur asnjë lloj censurimi, asnjë lloj pengese për të gjithë ata që i kanë plotësuar kushtet që të futen në proces zgjedhor, nuk mendoj që mund të flasim për ndonjë lloj censurimi të pjesëmarrjes ose procesit në tërësi”, tha tutje ajo.
Ndërkaq, e pyetur se a pritet që qytetarët serbë të mos marrin pjesë në këtë proces zgjedhor, Fejza tha se Lista Serbe nuk është institucioni i vetëm që përfaqëson serbët e Kosovës.
“E rëndësishme është që qytetarët ta shprehin vullnetin e tyre dhe procesi i jetës institucionale t’i kthehet normalitetit”, u shpreh Fejza.
Dje Komisioni Qendror i Zgjedhjeve mori vendim për certifikimin e subjekteve politike dhe kandidatëve për pjesëmarrje në zgjedhjet e jashtëzakonshme për kryetar të katër komunave: Mitrovicë e Veriut, Zveçan, Leposaviq dhe Zubin Potok. Këto katër komuna do t’i nënshtrohen procesit zgjedhor pasi kryetarët e tyre kanë dhënë dorëheqje pas vendimit të Listës Serbe nga institucionet e Kosovës si protestë ndaj vendimit të autoriteteve të Kosovës për suspendimin e drejtorit të Policisë së Kosovës për rajonin e veriut, Nenad Gjuriq, i cili ka refuzuar që të zbatojë vendimin e Qeverisë së Kosovës për riregjistrimin e makinave që kanë targa të lëshuara nga Serbia në RKS (Republika e Kosovës). /teve1.info./
