Në Kosovë edhe më tutje po vazhdon të keqpërdoret apo vjedhet energjia elektrike nga persona të ndryshëm. E si rezultat i kësaj, nuk mungojnë kontrollet nga Kompania Kosovare për Distribuim të Energjisë Elektrike, e cila bën matjen e saktë të shpenzimeve.
E për këtë, KEDS ka angazhuar rreth 90 punëtorë.
“Ne si kompani bëjmë kontrolle të vazhdueshme në cdo cep të Kosovës, kemi rreth 90 punëtorë të shpërndarë në secilin vend, fshat, qytet varësisht ku është e përcaktuar se ku do të kryhen këto kontrolle dhe janë mbi 50 ekipe të cilët janë të shpërndara në teren dhe që për fat të keq akoma ka konsumatorë jo të përgjegjshëm të cilët e keqshfrytzojnë energjinë elektrike”, ka thënë Margarita Rashiti, zëdhënëse në KEDS.
Rashiti tregon se vetëm gjatë javës së kaluar janë bërë rreth 2000 kontrolle ku 187 prej tyre janë identifikuar si keqpërdorues të energjisë elektrike.
“Gjatë ditës janë diku rreth 400 kontrolla të cilat kryhen në norma ditore e prej tyre rreth 40 identifikohen si keqpërdorues të energjisë elektrike. Ndërkaq sa i përket shifrave javore vetëm javën e kaluar janë bërë rreth 2000 kontrolle dhe 187 prej tyre janë identifikuar si keqpërdorues të energjisë elektrike”, tha ajo.
E rastet e tilla ekipet e KEDS-it i parashtrojnë për procedura të mëtutjeshme gjyqësore.
“Ne si kompani i kryejmë të gjitha procedurat të cilat ne i kemi sipas rregulloreve të brendshme dhe legjislacionit në fuqi, ne i identifikojmë ata dhe më pas i dergojmë kallëzim penal në gjykatat kompetente”, deklaroi Rashiti.
Ndryshe, keqpërdorimi i energjisë elektrike dënohet me ligjet e Kosovës.
Kronika e realizuar nga Lendrina Kodrolli.
