Në komunikatë thuhet se lajmi pozitiv se Sindikatës së Policisë së Kosovës i është pranuar kandidatura për anëtarësim në CESP, është kumtuar në hapje të Lojërave Sportive në nder të policëve të rënë në detyrë.
“Më 04.11.2022 kur është bërë hapja e Lojërave Sportive në nder të policëve të rënë në detyrë, nga Zëvendës Sekretari i Përgjithshëm i Këshillit Evropian të Sindikatave Policore (CESP), z. Marian Kicev, na u kumtua lajmi pozitiv se Sindikatës së PK-së i është pranuar kandidatura për anëtarësim në CESP”, thuhet në njoftim.
Teksa thuhet se ky vendim ka ardhur pas adresimit të letër interesit për anëtarësim në Këshillin Evropian të Sindikatave të Policisë në qershor të këtij viti.
“Të nderuar anëtarë të Sindikatës së Policisë së Kosovës, punonjës të Policisë së Kosovës, ju njoftojmë se pas takimeve me kryetarët e Sindikatave të rajonit (Maqedonia e Veriut, Mali i Zi dhe Shqipërinë) si dhe takimin me kryetarin e Këshillit Evropian të Sindikatave të Policisë CESP z. Ricardo Valadas, në qershor të këtij viti kemi adresuar një letër interesi për anëtarësim në Këshillin Evropian të Sindikatave të Policisë CESP, ku me një mbështetje nga kryetari z.Ricardo Valadas dhe nga anëtarët e Byrosë, sa i përket Republikës së Kosovës dhe Statusit të saj në Këshillin e Evropës më 27-28.10.2022 në Samitin e Madridit – Spanjë u ra dakord dhe u votua nga anëtarët e Byrosë që Sindikata e Policisë së Kosovës mund të hidhet për votim në takimin e radhës së Komitetit Ekzekutiv për të marrë momentalisht Statusin e Vëzhguesit në CESP”, thuhet në njoftim.
Kurse bëhet e ditur se dhënia e statusit të vëzhguesit për Sindikatën e Policisë së Kosovës u votua unanimisht nga anëtarët e Byrosë.
“Sapo Kosova të marrë statusin e anëtarit në KE, çështja e bashkimit të Sindikatës së Policisë së Kosovës me CESP do të vihet përsëri në rendin e ditës. Aktualisht dhënia e statusit të vëzhguesit për Sindikatën e Policisë së Kosovës u votua unanimisht nga anëtarët e Byrosë”, thuhet tutje./teve1.info/
